سمية الخشاب بعد إصابتها ببرنامج رامز: فيه تعمد للأذية.. ومسألش فينا

كشفت الفنانة سمية الخشاب تفاصيل إصابتها في برنامج رامز جاب من الآخر، مشيرة إلى أنها تعرضت لتمزق في الأربطة في القدم والكتف.

وأكدت "الخشاب" في تصريحات لها أن معدة البرنامج أخبرتها أن البرنامج هذا العام مختلف وحواري فقط، على الرغم من أنه كان يتم إخبارها بتفاصيل المقلب خلال ظهورها مع رامز في المرات السابقة.

وأوضحت سمية الخشاب: ما كانش حد عارف وموجود محادثات بنينا على التليفون بالدليل، اتقال لينا إن البرنامج مختلف وأنه برنامج حواري ومفيش مقالب خالص.. واتقال كده من المعدة وقالت هيقابلك ويستقبلك ويتكلم معاكي.. ولكن للأسف بعدها بتيجي الكارثة الأرض بتتتشق وبتنزل بشكل غير مدروس، لأن مش معقول كل الناس تتصاب ومكملين.. وفيه ناس مرضيوش يعملوا مشاكل وهما حرين وفيه إصابات أكتر مني.

سمية الخشاب: ليه الاستهانة بالناس

وأضافت سمية الخشاب مستنكرة: ليه الاستهانة بالناس كده وفكرة أنك تتطمن على الناس أو سوري أو سلامتكم لا حصلت معايا ولا مع حد تاني، على طريقة المثل: “خلصت حاجتي من عند جارتي”، وفيه تعمد للأذية لأنهم عارفين الناس هتتصاب ومصممين يكلموا.

وتابعت: اعمل حماية حتى لو مقلب، والناس كلها في كل العالم بتعمل مقالب لكن حاجات هزار ولذيذة وأنا عملت ده مع رامز من أكتر من 3 سنين، ومحصليش حاجة لكن كانوا بيكونوا قايلين ليا وعارفين وبكون عارفة لو هقع في مية والعمق قد إيه وبكون عاملة حسابي، المرة دي قلبي كان حاسس إن فيه حاجة هتحصل لي لي وكنت عاوزة ارجع قالوا والله ما فيه حاجة ويحلفولي دي طرطشة مياه.

سمية الخشاب: جالي تمزق في الأربطة

واستكملت: لما خرجت بره البلاتوه رجلي بدأت تورم وما كنتش حاسة ساعتها لأنه بيخطفك وكله ورا بعض، وفيه ناس كانوا متعورين وقاصص حاجات وأنا بقول رجلي بتوجعني ومش قادرة أدوس عليها.. وده غير آدمي ولا إنساني وجالي تمزق في الاربطة في رجلي وكتفي ومصطلحات تانية مش فاهمها غير الكدمات اللي كانت عندي.